Delegashon I&W Ta Bishitá Planta Di Awa Na Boneiru

Kralendijk – Djárason mainta Sra. Cora van Nieuwenhuizen Minister demishonario di infrastruktura i maneho di awa, a hasi un bishita na e planta di awa di Water- en Energiebedrijf Bonaire (WEB).

E minister tabata akompañá pa sr. Kees van der Burg, direktor general Mobiliteit, sra. Marjan van Giezen, hefe di departementu i miembro kordinadó di MT Cariben, Gerensia di Aviashon; i sra. Monique Faverey, kordinadó di maneho polítiko Hulanda Karibense.

Sra. Joanne Balentien, Direktor finansiero di WEB, a duna un presentashon di e desaroyonan importante di WEB, inkluyendo e proyekto di 9e EDF pa reparashon i rekonstrukshon di 11 km di tuberia di awa di irigashon, e tanki di awa nobo na Seru Largu i e planta di awa nobo ku ta den konstrukshon.

Tambe a presentá e proyekto di energia duradero di kual WEB a pidi sosten di parti di Hulanda: pa realisá 80 porshento di energia prosedente di fuentenan renobabel, ku un enfoke speshal riba redukshon di kosto pa e poblashon. Despues di e presentashon, sr. Hans Staring, Manager Business Unit Water a dirigí e delegashon pa un rekorido na e planta di awa ku ta den konstrukshon. Minister van Nieuwenhuizen tabata na Boneiru komo parti di su bishita di trabou na Kòrsou, Boneiru i Aruba di 12 te ku 15 di yüli.

WEB ta orguyoso di proyektonan grandi ku por a kontinuá di un manera seif i responsabel, apesar di e pandemia di COVID-19, i ta kontentu ku Minister por a tuma nota di esaki.

---

Lesa tambe:

• 
  Enkuesta: Kompetensia inhustu pa kompanianan lokal na Boneiru?
• 
  Sobrekargo di siguridat lo hasi pasashi for di Kòrsou un tiki mas karu atrobe 
• 
  TCB ta wak bèk riba eksitoso konferensia di turismo
• 
  Aeropuerto Flamingo no ta satisfecho ku sistema nobo pa entregá maleta
• 
  A renombrá Representante di Reino interino pa Boneiru, Sint Eustatius i Saba