Den kaso di Curoil: ABVO ta lamentá forma di proseder di koleganan sindikal

KRALENDIJK – Sindikato ABVO ta sinti su mes iritá dor di e akshonnan di un sindikato kompetidó ku ta parse di trese inkietut bou di empleadonan na Curoil Boneiru. 

Den último dianan, a surgi unres den e personèl, spesífikamente relashoná ku nan kondishonnan di trabou. ABVO ta mustra ku nan no ta kumprondé e inkietut aki, pasobra e sindikato ta na punta di finalisá un akuerdo kolektivo (CAO) ku e empresa, ku nan ta kere lo benefisiá e empleadonan.

ABVO ta sospechá ku un sindikato kompetidó ta tras di e intrankilidat, tratando di saboteá nan esfuerso. Aunke ku ABVO ta bisa di rekonosé e derecho di otro sindikatonan pa buska rekonosimentu den e organisashon pa medio di un referèndum pa determiná representashon di mayoria, ABVO ta atvertí ku un kambio di representashon bou di e personal por kousa retraso. 

Retraso

“ABVO a negoshiá un CAO ku ta kasi kla pa keda ratifiká. Un sindikato nobo lo mester kuminsá den e negoshiashonnan kompletamente di nobo”, segun un deklarashon di ABVO riba djarason. 

E sindikato tambe ta ekspresá su desaprobashon pa loke nan ta deskribí komo práktikanan non-korekto di parti di nan sindikato kolega.