Skibí pa Arthur Sealy

Atministrashon di Bonaire bou di maneho di MPB/UPB ta duna hopi tópiko pa diskutí. Mi no ta bai atendé ku: BIA, Akuerdo Atministrativo, Konseho di Entidat Públiko Bonaire, Rapòrt CRM Link, Isla den Saliña Vlijt ni Rotònde.

Mi ta atendé ku DRO i TCB. DRO a traha un pelíkula di propaganda pa tapa wowo di pueblo. Un tayer di trabou ku ta kuminsá ku alabá Dios. Unda separashon di Estado i Religion a keda. Presentashon mitar mitar, sea ta usa Papiamentu òf Hulandes .A mustra riba proyekto, reorganisashon, burokrasia, mas eksperto ageno i separashon di polítika i trabou. 

Resultado di e komedia ta: DRO no tin ni punto debil ni menasa. DRO su puntonan fuerte ta: Tene kliente na liña, burokrasia pa stanka e prosedimentu, laga yu di tera warda riba pèrmit, nunka e ámtenarnan ta na nan lugá sintá, no ta komuniká ku kliente, hopi outo pa kore “kontrolá”, funshonamentu deplorabel, mas krítika mas mihó, trahadónan kompinchi di partido i sakamentu di pia pa otro.

Puntonan di oportunidat di DRO ta; mas kliente pa tene na liña, mas dokumento pa pèrdè, “werkverschaffing” pa konsùltent Europeo, amigunan polítiko mas grupo di trabou, mas grupo pa skirbi rapòrt, tene diputado afó, no realisá nada, mas pèrmit pa bai den lachi, uso indebido di outo di servisio, mas investigashon pa mustra kon malu DRO ta funshoná i rapòrt tékniko ku ta saka tur hende liber.

Direktor Martina legumai e aserkamentu bieu di Akademia Sosial ku batimentu di boka. Tuma un posishon di direktor i pone e hendenan aki funshoná, laga nan sinta na kantor, stòp kore pariba pabou den outo di servisio, duna nan tarea pa terminá kada siman i evaluá tur djabièrnè i konsehá algun pa bai ku penshun. Laga nan bai yora serka diputado òf bati AO.

Na TCB tin dos kaso inaseptabel. E direktor nobo di TCB a anunsiá ku e ta keda lider di su partido polítiko na Kòrsou. E otro punto ta ku a tuma den servisio un persona ku un pasado, sea bèrdat òf nò, kuestionabel. Konseho di Entidat Públiko i su komishonnan a bira un skol pa siña hasi pregunta tantu verbal komo por eskrito i defendé diputado i konseheronan.

Debatí i kontrolá a pasa pa istoria. Loke ami por i ke hasi ta: hiba kombersashon ku AFBW i e grupo di dosente ku a duna e kurso di teoria di gobernashon pa duna un kurso di e práktika malu di e maneho atministrativo di MPB/UPB.