KRALENDIJK- Despues di un periodo hopi largu, Boneiru por fin tin servisio di transferensia di sèn den forma di Western Union atrobe.
E serviso di Western Union awor ta wòrdu ofresé pa serviso di pòst na Boneiru. Nicole Merkies, direktora di FXDC a splika ABC Online Media ku e inisio di servisio a bira posibel despues di un periodo di preparashon hopi largu. Manera ta konosí e sisema di serviso di transferensia di plaka a bira problemátiko na Boneiru, despues di 10/10/10 ya ku De Nederlandsche Bank ta pone hopi eksigensia pa evitá labamentu di plaka. Un tempu MCB tabata ofresé e servisio di MoneyGram, pero a opta pa no sigui ofresé esaki.
Tin vários komersiante a purba di bin bèk ku e sistema di transferensia aki, i spesialmente tambe Western Union ku ta un di e nòmber mas konosí pa loke ta trata e tipo di servisio aki. Transferensia di sèn di forma rápido ta importante pa hopi estranhero riba e isla, ku no tin kuenta bankario òf kaminda ku nan famia pa ken nan ta transferí e sèn no tin kuenta bankario òf no tin bankomátiko kaminda ku nan por lanta plaka sin problema. Hopi estranhero tabata man na kabes pa e falta di e tipo di serviso aki na Boneiru, i meskos tambe na St. Eustatius en Saba.
Merkies a indiká tambe ku a kuminsá ofresé e servisio na un manera di ‘soft opening’ pa asigurá ku no tin problema ku e tramitenan ku mester hasi i ku tur sistema ta funshonando manera debe ser.
E direktora di FXDC a indiká tambe ku no ta sigur ainda ku lo bai ofresé e servisio aki na St. Eustatius i Saba, pero posiblemente den futuro esaki lo bai ta e kaso sí. “Nos ke asigurá nos mes ku tur kos ta kana bon i sin problema na Boneiru, promé ku nos ekspandé nos servisio na St. Eustatius i Saba”, asina Merkies a bisa.
Konseshon
Ta importante pa nota ku St. Eustatius i Saba tambe ta kai bou di e mesun konseshon di distribushon di pòst i otro serviso di FXDC, kaminda tin un derecho úniko pa ofresé serviso di pòst.