WILLEMSTAD – Pa promé biaha despues di tres aña tabatin un diskoteka di ròlstul di Cliniclowns na Fundashon Verriet na Santa Maria. Masoménos setenta mucha i nan guiadónan a gosa di e kolaborashon aki entre CliniClowns Curaçao i ParadiseFM. 

Banda di e presensia di e CliniClowns, DJ Maarten Schakel a pèrkurá pa muzik i boluntarionan di patronisadó korporativo BDO-accountants a pinta e kara di e muchanan ku fèrf di kara.

“Tabata realmente un regalo pa por a organisá esaki atrobe”, segun Eveline van Zanen di CliniClowns Curaçao. “E último biaha tabata na final di 2019, promé ku e pandemia di corona”.

“Nos ta bini aki tur siman un mainta di bishita ku CliniClowns, pero e diskoteka di ròlstul di tur aña ta realmente un kulminashon pa tur hende. Nos a sinti falta di e fiesta”.

Fundashon CliniClowns Curaçao ta pèrkurá djeskuater aña kaba pa distraishon i alegria pa muchanan malu, muchanan ku un limitashon i personanan ku deménsia.

E payasonan ku ta spesial entrená ta bishitá diferente instansia gratuitamente i ta pèrkurá pa momentunan chikitu di felisidat ku e meta pa laga un mucha sinti’é mucha, sin importá su malesa òf limitashon, i saka hendenan grandi for di nan isolashon. 

E fundashon ta dependé kompletamente di sosten di e komunidat di Kòrsou, entre otro di patronisadónan, aktividatnan pa rekoudá fondo, regalonan i patronisamentu di sosionan korporativo.