KRALENDIJK – For di 12 di mart 2022, personanan riba 70 aña i otro hendenan ku un salú vulnerabel por pasa un di dos angua di buster. E di dos angua di buster ta disponibel tambe pa habitantenan di kasnan di kuido i hende grandi. I pa tur hende ku problema médiko serio ku un karta di referensia di nan spesialista. Meskos ku tabata e kaso pa e promé angua di buster, e hendenan akí ta haña konseho di nan spesialista pa pasa e di dos angua di buster.

Hendenan vulnerabel mester di un angua di buster pa motibu ku nan ta kore mas riesgo pa bira hopi malu den kaso di kontagio. Serka nan, protekshon di e anguanan di corona i e promé angua di buster ta baha mas lihé ku serka otro hende. E di dos angua di buster ta pone ku nan ta èkstra protehá atrobe. Pa e di dos angua di buster ta usa e bakuna di Pfizer.

Tin kondishon pa personanan di riba 70 aña i otro hendenan vulnerabel pasa e di dos angua di buster. Nan mester a pasa nan angua di buster tres luna pasá òf mas. Si nan a haña corona, nan mester a haña esei minimalmente tres luna pasá.

Sin sita

Personanan riba 70 aña i otro hendenan vulnerabel por pasa e di dos angua di buster djasabra 12 di mart 2022 sin sita na Sentro Deportivo Jorge Nicolaas. I esei por di 09:00 – 14:00. Personanan ku pa motibu di nan salú òf un otro motibu no por bai e sentro deportivo fásilmente, por yama 0800 0900.

Via e number akí, nan por traha un sita pa pasa e di dos angua di buster na kas. Habitantenan di kasnan di kuido i di hende grandi por pasa e di dos angua di buster na e kasnan ei mes. E departamento di Salubridat Públiko tin plan pa ofresé e di dos angua di buster na Rincon tambe. Tin ku anunsiá e fechanan ainda.