KRALENDIJK- Diabierne ku a pasa a tuma luga e seremonia di klousura di Summerschool 2024 na Eden Beach.

Gezaghèber interino Nolly Oleana a dirigí palabra na e mucha hende durante e okashon i a enkurashá nan pa semper kere den nan mes. Na tur, 40 mucha a risibí un sertifikado di partisipashon.

Mas ku mitar di e mucha partispante a yega recientemente na Boneiru i ta parti di e klasenan di ISK (Internationale Skakelklas). Duranti e Summerschool nan a sigui un kurso intensivo di Hulandes. E otro muchanan, di grupo 7 i 8, a risibí un empuhe adishonal den e idioma hulandes i diferente abilidat manera traha huntu i hasi entrevista.

Oportunidat

Oleana a motivá e muchanan pa usa e oportunidatnan ku ta wordu ofresé. “Mi kòrda ku mi mes mester bai Hulanda i mester a kustumá na e forma diferente ku hende ta papia aya. Akinan nos ta papia kuater idioma; hasi uzo di esaki”, gezaghèber interino a duna e partisipantenan komo konseho.