Di tres kongreso pa profeshonalnan den komunikashon den Reino i Sürnam

WILLEMSTAD – Riba djaweps 1 di sèptèmber i djabièrnè 2 di sèptèmber 2022 Rijksdienst Caribisch Nederland ta organisá  e di tres kongreso, titulá ‘Komunikashon Forsa di Reino’ den WTC na Kòrsou.

E kongreso ta pa profeshonalnan den komunikashon ku ta den servisio di gobièrnunan òf organisashonnan ku tin vínkulo ku gobièrnu di Aruba, Boneiru, Kòrsou, Sint Maarten, Saba, Sint Eustatius, Hulanda i Sürnam.

E meta di e kongreso ta pa promové komunikashon, traspaso di konosementu i union. Un bon ret di profeshonalnan di komunikashon ta fortalesé kapasidat dentro di Reino i afó. Ministerio di Asuntunan Interior i Relashonnan di Reino i Ministerio di Hustisia i Seguridat a finansiá e kongreso.

Durante di e kongreso ta duna riba djaweps 1 di sèptèmber e tayer ‘Komunikashon di krísis: Traha huntu den wowo di e tormenta’ pa un grupo di meta mas amplio. E tayer aki ta interesante pa tur ku ta hunga un papel durante un krísis i no nesesariamente mester ta empleá na (semi)gobièrnu.

E tayer ta na enkargo di Svenja Westerduin i Francien Machielse, ekspertonan riba tereno di komunikashon di krísis i riesgo na Kordinadó Nashonal di Kombatimentu di Terorismo i Seguridat i e Sentro di Krísis Nashonal di ministerio di Hustisia i Seguridat.