Dia habrí di LVV ta birando mas i mas popular

KRALENDIJK- E dia habrí na servisio di LVV ta birando mas i mas popular, ku kada biaha mas bishitante, pero tambe mas kos di kumpra, mas stènt ku kuminda i mas musik. 

Djadumingu tambe por a nota ku hopi hende a probeschá di bishitá LVV for di mainta trempan, ora a habri 8 or, te ku 3 ‘ or di atardi, ora e dia habrí a yega na su fin. Por a mira rei basta largu di outo na yegada di LVV, ku tabata para kant’i kaminda, pero tambe riba un lugar di parker spesial. 

Hopi tabata e hendenan ku a yega pa kumpra algu, manera mata, simia òf pòchi di mata, pero tambe hopi hende a yega pa kumpra algu di kuminda. Por nota tambe ku e kantidat di stènt i e variashon di tur loke por kumpra, ta bira kada bes mas importante.