WILLEMSTAD – Direktor di Sentro di Detenshon i Korekshon Kòrsou, SDKK, Urny Floran ta bai ku VVU riba término korto. For di 1 di ougùstùs 2022 SDKK ta sin direktor. 

Direktor di prizòn SDKK a emití un karta di seis página komo despedida for di tur kolega di e instituto. Den su karta e ta splika amplio di algun problema i retonan den SDKK.

Sr. Floran a indiká ku e la tuma su VVU, despues ku Gobièrnu di Kòrsou a duna e oportunidat aki, pero no ku e ta bai kompletamente satisfecho. Komo Direktor di SDKK e tin bastante aña ta pidi i mustra Gobièrnu nan di turno di kambionan ku mester tuma lugá den e instituto i lamentablemente Gobièrnu ta keda kòrta den presupuesto di e instituto. Sigur un 120 persona a bai for di SDKK i pa motibu di paro di personal no por a tuma otro persona den servisio. Ta di lamentá ku komo direktor el a mustra na vários okashon ku mester a tuma desishon pa un instituto nobo komo prizòn, pero ku awor aki e ta baha sin esaki a tuma lugá. 

Mas aleu sr. Floran a indiká ku e no sa ken lo bira e direktor nobo, pero ku Minister di Hustisia lo mester indiká esaki despues di 1 di Ougùstùs 2022.

Entrante djaluna próksimo 1 di Ougùstùs 2022, Sentro di Detenshon i Korekshon Kòrsou (SDKK) lo ta sin direktor despues ku sr. Urny Floran baha ku VVU i tambe Brandweer Curaçao  lo ta sin komandante pa motibu ku Sr. Elvin Regina tambe ta baha ku VVU. Minister di Hustisia, Shalten Hato a indiká ku pronto Ministerio di Hustisia lo emití vakatura pa ámbos funshon.