KRALENDIJK – Dive master Rugene Marinus, mihó konosí komo Spider, a pasa den e eksperensia mas bunita di su bida, ora un chuchu a pidiele ayudo durante un sambuyamentu.

Spider tabata na kaminda ku su wespetnan merikano pa un di dos sambuyamentu pa e dia ku e boto Blue Moon di Toucan Diving, na unda e tin 6 aña trahando. E grupo Villigers ta un grupo di pensionado di hende den edat di 70 aña bai ariba di Florida. Durante e sambuyamentu un chuchu grandi a sali for di profundidat i a aserká e grupo.

“E divemaster a mira ku e chuchu tabata tin mester di ayudo, dor ku tabata tin asina un bòl di linea di piska mará na su kurpa. Spider a landa bai serka e animal i por a kita mayoria parti di e liñea di piska, pero no tur kos. Un dama di e grupo a pasa un kuchú pa Spider, pa sigui kòrta e último pida di e lineanan. Despues di esaki e chuchu a landa bai.

Pòtret

Hinter e operashon di reskate a sosodé den bista di e grupo di Florida, di moda ku esakinan por a saka hopi pòtret i video di e evento. Pa sorpresa di e grupo, e chuchu a bin bèk un biaha mas i a lanta un salto, pa kai bèk den laman.

Phillis Mihalas a kompartí su eksperensia ku Caribbean Islands Manta Conservation Program. Danki na e kantidat i kalidat di e pòtretnan por a registrá e chuchu, ku a haña e nòmber “Spyphill”.