Notisia

Djamars promé boto ku fruta for di Venezuela pa Boneiru

KRALENDIJK – Mañan djamars 18 di yüli ta spera e promé barku di fruta for di Puerto Cabello. E produktonan na bordo no ta pa benta detayá den haf, pero pa empresanan lokal ku tin e pèrmitnan nesesario.

Segun Entidat Públiko Boneiru, OLB, no tin diferensia ku e situashon promé ku a sera frontera ku Venezuela.

‘E hafnan di Tucacas i Puerto Cabello ku semper a sirbi Boneiru, tabatá enfrentá algun reto,’ segun Jolinda Craane, e diputado ku ta enkargá ku asuntunan ekonómiko. ‘Awor nos ta hasiendo e preparashonnan pa reanudá e tráfiko marítimo entre Venezuela i Boneiru atrobe.’

Den e último lunanan OLB, ministerio di Asuntunan Eksterior, Ofisina di Haf, Kwartiermaker di Ekonomia, Duana i agensianan lokal a hasi e preparashonnan nesesario. Nan a traha huntu ku outoridatnan Venezolano pa hasi e negoshi marítimo posibel atrobe. Mirando e eksperensianan na Kòrsou i Aruba, nos por spera ku preis di produkto lo baha na Boneiru tambe, segun Craane.

Ya pa basta tempu Boneiru ta sperando ansioso e yegada di e barkunan di Venezuela ku bèrdura i fruta fresku, i tambe material di konstrukshon. Na 2019 Venezuela a sera e frontera marítimo ku Boneiru, pero for di 3 di aprel 2023 a habri frontera atrobe.

Deel dit artikel