Dòkter van der Vaart ta risibí kondekorashon Real

KRALENDIJK- Theodorus Aloysius Marie “Dick” van der Vaart a risibí kondekorashon Real for di mannan di Gezaghebber Edison Rijna, komo muestra di gratitut pa su dedikashonnan.

Van der Vaart promé ku la baha ku penshun tabata direktor i dòkter di kas independiente na Centro Médico Central Bonaire, direktor di un sentro hiperbáriko, dòkter di buseo, dosente i músiko. Van der Vaart tabata un forsa determinante tras di realisashon di un kamber di rekompreshon na Boneiru basá riba e kresementu di e indústria di buseo. 

Tambe e kamber aki por us’é pa diferente tratamentu di pashent, por ehèmpel den kaso ku un herida no ke sera den pashent ku sierto kondishonnan spesífiko. Ku realisashon di e sentro hiperbáriko aki dekorandùs por a yuda skapa hopi bida eksitosamente, skapa hopi persona di amputashonnan i tambe hasi di Boneiru un destino popular i ku seguridat pa e turismo buseador.

Okashon

Mester bisa ta èksistí e opshon pa por skohe pa risibí un kondekorashon durante okashon general òf por skohe pa un okashon partikular. Mirando e echo ku dekorandùs tabata teniendo un simposio tokante kamber di rekompreshon algun persona yegá na dòkter Dick van der Vaart a opta pa sorpres’é na e okashon ei.

Mirando tur e lokualnan dekorandùs a hasi  su Mahestat Rei Willem Alexander a nombra dòkter Dick van der Vaart komo Öfficier in de Orde van Oranje Nassau”. Gezaghèber Edison Rijna na e okashon aki a felisitá dekorandùs ku e bunita logro aki.