Kralendijk- Doñonan di BOPEC siman pasá den tratamentu di e kaso pa deklará e kompania fayit, a bisa ku, via di un terser partido, nan lo por manda 2.5 mion dòler riba kuentanan di e kompania pa paga salario i otro gastunan.

Esaki por komprondé di e fayo ku a dikta siman pasá kaminda a deklará BOPEC fayit. Durante tratamenti di e petishon di entre otro òntfanger i tambe e ‘bewindvoerder’ di BOPEC abogadonan di e kompania a bisa ku un terser partido lo por a depositá ‘dentro di poko’ un suma di 2.5 mion di dòler ku por wòrdu usá líbramente pa e kompania.

Sinembargo, wes mr. P.E. Kort no a keda konvensí pa ku e promesa di e doñonan. Ela mustra riba e echo ku BOPEC no por a supstansiá masha bon for di una e sèn lo bini, òf ku esaki lo kambia e situashon den su totalidat.

Curator

Wes a apuntá mr. Stan Van Liere, di e ofisina di abogado HBN Law komo curator pa manehá e fayit di BOPEC, ku por sierto lo por resultá un trabou enorme mirando e magnitut di e negoshi.