Kralendijk – Kolegio San Luis Bertran na Rincon i Skol Amplio Papa Cornes na Hato ta sera nan portanan durante dos dia. Motibu di esaki ta ku miembronan di personal a kontagiá ku e vírùs di corona.

Despues ku a konstatá Covid-19 serka algun dosente di Kolegio San Luis Bertran na Rincon, a resultá ku un gran parti di personalku ta duna lès na e skol tambe mester bai den karentena. Pa e motibu aki e dosentenan no por ta físikamente presente mas den klas. Departamento di Salubridat Públiko di Entidat Públiko Boneiru a konsehá e skol pa laga e dosentenan ku no ta malu duna lès digitalmente. E skol ta sera durante dos dia pa organisá esaki.

Na Skol Amplio Papa Cornes tambe nan a konstatá Covid-19 serka algun miembro di personal. E skol aki tambe ta sera durante dos dia. Ta usa e tempu ei pa huntu ku departamento di Salubridat Públiko haña un bista eksakto di kuantu dosente mester bai den karentena òf ku por sigui duna lès normalmente na e skol.

Karentena no na nodi

Alumno(a)nan di e dosentenan ku a tèst positivo no tin mester di bai den karentena. Ta pidi nan mayornan pa vigilá nan salú i den kaso ku tin keho laga tèst nan yu.

E otro skolnan ta keda habrí normalmente. Baimentu di skol ta importante pa salú i desaroyo di nos muchanan. Alumno(a)nan di enseñansa básiko no tin mester di tene distansia for di otro den klas. Enseñansa por sigui normalmente.

Deporte

Aktualmente ku e nivel di riesgo 5, den kua Boneiru ta awor aki, ta prohibí deporte na skol den un sala di deporte. Esaki pasobra e vírùs di corona por plama mas fásil ora di hasi deporte den un espasio será. Ta pèrmití deporte den aire liber normalmente. 

---

Lesa tambe:

• 
  Thuersten Winklaar ta bringa pa e título di Kampion Hulandes na Den Haag
• 
  Prevení Zika, Dengue i Chikungunya
• 
  Zulay Nahr ta kompartí alegria di Pasku ku famianan den nesesidat na Boneiru 
• 
  Winair i KLM reintrodusí akuerdo di kódigo kompartí
• 
  Komishon Herensia Kultural ke protekshon pa identidat di Dia di Rincon