Dos turtuga di laman na Boneiru ekipá ku transmisor di satélite 

KRALENDIJK – Fin di siman pasá Sea Turtle Conservation Bonaire (STCB) a ekipá dos turtuga di laman ku transmisor di satélite. Ta trata di un turtuga di laman bèrdè i un loggerhead (un turtuga di karèt falsu). Ku e transmisornan por sigui e turtuganan di laman. 

A haña e turtuga di laman bèrdè na Playa Chikitu na momento ku e tabata pone su nèshi. Ora e nèshi tabata kla STCB a ekipá e turtuga di laman bèrdè aki, ku tin un kaska di 1.10 meter, ku un transmisor. E turtuga aki yama Mateo. A dun’é e nòmber na memoria di Joshua Mateo Fortes-Jordan, ku tabata enkantá ku e turtuganan di laman di Boneiru.

A haña e otro turtuga di laman na kosta suit di Boneiru. E loggerhead, ku un kaska di 95 sentimeter, tambe a haña un transmisor despues ku el a pone su nèshi. A yama e turtuga aki Gabriela.