DUO ta sigui ku informashon online pa área di Karibe

Kralendijk- Na fin di aña pasa, Dienst Uitvoering Onderwijs (DUO) a lansa un kampaña di informashon online pa (èks) studiantenan di e área di Karibe. E kampaña a kuminsá paso no tabata posibel pa hasi un bishitá físiko na e islanan dor di corona.

E opshonnan di kontakto online tabata asina eksitoso ku a disidí di kontinuá ku esakinan den e próksimo lunanan.  E informashon ta konsistí di un di dos webinar pa futuro studiantenan i akshonnan pa prevení problemanan di pago pa esnan ku tin ku paga bek.

Webinar pa futuro studiantenan

Riba 15 di aprel DUO ta organisá e webinar ‘Studiefinanciering aanvragen vanuit het Caribisch gebied: de praktische zaken’. Esaki ta un kontinuashon di e webinar ‘Studiefinanciering aanvragen: hoe werkt het?”, ku a tuma lugá na novèmber. Den e webinar aki, futuro studiantenan lo haña informashon tokante tur e asuntunan práktiko ku nan mester regla pa nan finansiamentu di estudio na Hulanda. Por wak e webinar ku suptítulo na Ingles i Papiamentu.  Ta posibel pa registrá pa e webinar via duo.nl/webinar.

Yudansa ku pagonan atrasá

DUO lo sigui aserká esnan ku ta atrasá ku nan pagonan, efektivamente. DUO lo informá esnan ku ta bai kuminsá paga bek kon nan por evitá ku nan ta haña nan den problema, dor di apliká pa kapasidat finansiero òf dor di paga bèk lokalmente.

Pa esnan ku tin ku paga bèk ku tin mas ku un debe òf pa esnan ku e posibilidatnan ariba menshoná no ta un solushon, nos lo pidi nan pa tuma kontakto ku nos. Huntu ku un empleado di DUO lo purba yega na un solushon personalisá.

Kontakto personal via chat o via yamadanan atraves di video.

Den e último lunanan DUO a amplia su servisionan pa e área di Karibe ku e posibilidat pa chat i yamadanan atraves di video. E tipo di kontakto personal aki ku un empleado di DUO a kai den bon tera. Pa e motibu aki nos lo kontinuá ku esaki. Riba djaluna, djamars i djaweps studiantenan i èks studiantenan por chat via duo.nl/antillen. Ta posibel pa hasi un sita pa yamada via video riba djárason i djabièrnè.