Kralendijk- Segun informashon di Tourism Corporation Bonaire (TCB) durante temporada di ‘high season’ Boneiru lo mira buelonan diario entre Atlanta e Boneiru.

Segun TCB a bisa, tin un interes grandi di biaheronan for di Merka ku ke bishitá Boneiru den e temporada di wenter benidero. Mirando ku e demanda ta sumamente grandi, Delta a disidí di oumentá buelonan pa Boneiru diariamente pa kumpli ku e demanda di e temporada benidero.

Kuminsando dia 18 di desèmber 2021 pa 2 di yanüari 2022, Delta lo bai tin buelo diario for di Atlanta pa Boneiru. E buelonan diario lo sali 09:45 for di Atlanta i lo yega 13:57 na Boneiru. E buelonan diario pa bai bek Atlanta lo sali 15:59 for di Boneiru i lo yega 19:29 na Atlanta. Buelonan diariamente tambe lo ta disponibel kuminsando dia 1 di mart 2022 pa 3 di aprel 2022, antisipando e drùk di e temporada di primavera na Merka.

Logro

“Esaki ta un logro importante pa e isla, mirando ku ta pa promé biaha ku Delta ta ofresé e servisio di buelo diario pa Boneiru,” segun Miles Mercera, Direktor na Tourism Corporation Bonaire. E oumento di buelonan pa Boneiru lo kumpli ku e demanda ku tin i tambe lo pèrkurá pa un manera di biaha direkto entre Merka i Boneiru. Nos ta ansioso pa risibí un kantidat adishonal di bishitante i ku por ekperensiá un variedat di paisahe bunita, un kultura diverso i tur e otro kosnan espektakular ku Boneiru tin pa ofresé.

Despues di un temporada kòrtiku sin operashon dor di e pandemia, e aerolínea a resumí buelonan direkto pa Boneiru riba djarason i djasabra, dia 5 di yüni 2021. Resientemente, Boneiru tambe a agregá un lokalidat di tèst na Flamingo International Airport, pa fasilitá biaheronan ku tin ku hasi un tèst rápido di antigéniko.

E protokòl aktual pa biaheronan for di Merka pa por drenta Boneiru ta ku un resultado negativo di tèst di PCR, denter di 24 ora promé ku salida òf un resultado negativo di tèst di PCR, denter di 72 ora promé ku yegada na Boneiru i un tèst antigéniko hasí direktamente na yegada na aeropuerto di Boneiru. E lokalidat di tèst na aeropuerto tambe lo benefisiá biaheronan ku ta biaha bek pa Merka, mirando ku nan por risibí resultado di nan tèst den 15 minüt.