WILLEMSTAD – Kòrsou ta saka konsiderabel mas sèn ku a presupuestá na personanan ku ta baha ku penshun adelantá. A reservá djes mion pa esaki, pero te ku òktober ya a saka djeshete mion. Esaki Kolegio di Supervishon finansiero ta informá.

Àmtenarnan ku ta serka di baha ku penshun tin e posibilidat pa stòp di traha mas promé via un areglo di baha mas tempran.  E medida ta nesesario pasobra Kòrsou tin un ‘kabes grandi’ di ámtenarnan di edat i komo tal mas karu. 

Tambe e areglo mester atendé ku efisiensia di e aparato di ámtenar, pasobra e produktividat laboral, pa medio di un gran kantidat di ámtenar di edat, ta laga di deseá.

Si ta alkansá e meta, no ta sigur pa hopi hende. E salida di ámtenarnan te ku awor no a kondusí na rehuvenesimentu di e aparato di ámtenar, pero mas bien na un falta di personal i preshon mas haltu di trabou pa e personanan ku a keda.

Den un aña di tempu masoménos 600 ámtenar a hasi uso di e areglo di retiru. E bentaha ta gastunan di personal mas abou, pero tambe pa un solo biaha gastunan haltu di retiru.

Tin menasa tambe di surpasá e pòst di gastu pa overtaim, mientras ku gobièrnu Pisas a bisa anteriormente ku lo atendé ku e gastunan di overtaim ku ta subiendo. E Kolegio ke sa awor kiko gobièrnu a hasi den e lunanan ku a transkurí pa kumpli ku tal promesa.