BRASILIA – E kantidat di kandela di mondi ku ta asotando pareu den e área di Amazona na Brasil no tabata asina grandi den djessinku aña. 

Djaluna tabata trata di 3358 kandela diferente den un periodo di tempu di 24 ora, e insituto di investigashon espasial nashonal INPE ta informá. Esei ta kasi tres biaha mes tantu ku durante e dia mas desastroso na ougùstùs 2019, ora ku imahennan di e selva tropikal ku tabata na kandela a pasa rònt mundu.

INPE for di 1998 ta registrando diariamente for di espasio e kantidat di kandelanan di mondi den e selva tropikal mas grandi di mundu. E echo ku a alkansá e siman aki e kantidat di kandelanan mas grandi desde 2007, no ta bini komo sorpresa pa doño di INPE Alberto Setzer. “E kandelanan ta move mas i mas bai nort”, e ta komentá ku e agensia di notisia Franses AFP.

Luna pasá a mira en total 5373 kandela riba imahennan di satélite, un subida di ocho porshento kompará ku luna di yüli di aña pasá. E luna aki e área di Amazona  ta bayendo den e direkshon di  “e luna di ougùstùs mas pió”,  ku ya kaba 24.124 kandela, for di ora ku presidente Jair Bolsonaro a yega na poder. Bolsonaro a pone den su periodo di gobernashon énfasis riba interesnan ekonómiko enbes di protekshon di naturalesa

E kandelanan di mondi mayoria biaha ta kana paralelo ku pèrdida di mondi.  Dia ku, na 10 di ougùstùs 2019, kunukeronan den konsulta huntu a pega partinan di e selva tropikal na kandela i krea asina un nubia di kandela diki  i pretu, ku por a mira 2500 kilometer mas leu na Sao Paulo, mundu a reakshoná indigná. E tantísimo kandelanan ku tin e siman aki, segun Setzer, no ta kordiná, pero simplemente konsekuensia di e kantidat di kapdónan di palu ku a oumentá.

Fondo di Naturalesa Mundial a konstatá anteriormente e aña aki ku ta kap hopi mas palu den selva tropikal. E organisashon di naturalesa a asosiá esei ku e elekshon pa presidente na Brasil ku ta aserkando i ku e guera na Ukrania, ku komo konsekuensia ku ekportashon Ruso di diferente materia prima a para ketu. Brasil ta purba di reakshoná riba esei.