GRONINGEN – Dienst Uitvoering Onderwijs, DUO, ku ta manehá finansiamentu di estudio na Hulanda, a ignorá por lo ménos tres biaha atvertensianan di posibel prehuisio i uzo di kriteria diskriminatorio durante kontrolnan di froude. Ta parse ku ta akusá studiantenan ku un orígen imigrante remarkabel hopi biaha di froude ku finansiamentu di estudio, segun investigashon di NOS i Investico.

 A base di e konklushonnan aki DUO ta bisa ku nunka antes nan no a risbí semehante señalnan. Pero dos abogado a ekspresá i dokumentá nan sospechonan den diferente kaso den korte di posibel deskriminashon di DUO. Tambe un studiante a entregá un keho ofisial na 2021 pa motibu di deskriminashon.

E studiante Kurasoleño, Jaïr – su berdadero nòmber ta konosí pa NOS – a habri na fin di luna di mei 2020 un meil di DUO kaminda ta akus’é di froude ku un beka di estudio pa studiante ku no ta biba na kas di su mayor. Pa su sorpresa a manda e mésun meil aki pa 28 otro studiante, di kual mayoria no tabatin nòmber Hulandes. E kaso ta importante pa studiantenan di Kòrsou, pasobra hopi di nan ta studia na Hulanda  i ta dependé di DUO pa nan finansiamentu di estudio.

E situashon a eskalá i bai korte, kaminda e abogado di Jaïr a argumentá ku e selekshon di e sospechosonan posiblemente tabata basá riba karakterístikanan étniko. Apesar di e deklarashonnan di DUO ku e kriterianan tabata ophetivo, manera e distansia entre e bibienda di e studiante i su mayornan, wes a duna Jaïr rason.

Suspendé

Den un reakshon riba e investigashonnan minister Dijkgraaf a suspendé e sistema di froude di DUO temporalmente i a inisiá un investigashon pa averiguá kon por aklará e representashon eksesivo di studiante ku un orígen imigrante.

Pa studiantenan di Kòrsou na Hulanda e situashon ta alarmante. Profilashon étniko por afektá nan desproporshonal i trese nan aña di estudio na peliger.  Ta p’esei e desaroyonan rondó di DUO i e manera di atendé ku foude ta sumamente importe.