ORANJESTAD –Siman pasá a efektua buelonan di demostrashon ku e Pipistrel Velis Electro, un avion di investigashon di Sentro Aéreoespasial di Reino Hulandes, NLR, ku ta traha ku koriente.

Pa aña alrededor di 150.000 pasahero ta biaha entre Boneiru, Kòrsou i Aruba. Transporte aéreo ta indispensabel, pero mester ta mas efisiente, pagabel i duradero. Buelonan eléktriko por ofresé un solushon pa e islanan ku ta relativamente serka di otro (distansianan ta varia di 30 te 190 kilometer).

E buelonan di demostrashon na Aruba ta demostrá kiko ta posibel. E buelonan ta forma parti di e konferensia A flight to the future, ku tabata organisá pa The Dutch Caribbean Cooperation of Airports (DCCA), i ku a tuma lugá di 7 te ku 11 di novèmber. Aviashon duradero di futuro tabata e tema sentral. 

Ounke a tene e demostrashonnan ku un avion eléktriko di dos asiento e intenshon final ta pa bai bula ku avionnan di 9 i 19 stul.

I tin mas motibu pakiko e islanan ta ápto pa aviashon eléktriko.  Por generá energia bèrdè for di solo i bientu ku tin na abundansia riba e islanan. Na aeropuerto di Aruba tin e di dos parke solar mas grandi, kaminda anualmente ta generá entre 5000 i 6000 MWh na koriente.