Kralendijk – Di djamars 30 di mart 2021 te ku djabièrnè 2 di aprel 2021 por hasi tèst di COVID-19 na departamento di Salubridat Públiko sin traha sita. Hende ku tin keho ku ta parse COVID-19, por tèst entre 09:00 i 11:30 di mainta. A skohe pa esaki pa hasi mas fásil pa hende por laga tèst nan mes, asina e departamento ta bisa.

E number 0800 0800 pa traha sita tabata temporalmente difísil pa alkansá.

Ménos kontagio?

E delaster dianan ta parse ku e kantidat di kaso di hende ku a pega ku e vírùs ta birando ménos. Pero Salubridat Públiko ta kere ku en realidat e kantidat di kaso di hende ku a pega ku e vírùs ta haltu ainda. I ku hende ku tin keho ta bai tèst ménos.

Si tiki hende  bai tèst, e departamento no por sa ken a pega ku e vírùs i asina no por isolá hende i protehá nan kontaktonan.  Di e forma ei e vírùs por plama libramente. Ta p’esei departamento di Salubridat Públiko ta hasi un yamada na tur hende ku tin keho òf keho leve pa nan bai tèst mas lihé ku ta posibel.