E supuesto tiradó durante Zomercarnaval ta un Yu di Kòrsou di 26 aña

ROTTERDAM – E supuesto tiradó durante Zomercarnaval na Rotterdam djasabra último ta e hòmber di 26 aña prosedente di Kòrsou ku nan a detené. E ta keda detené pa un periodo mas largu, Ministerio Públiko (MP) ta informá.

E víktima ta un hòmber di Gulpen di 21 aña. Tantu e komo un hòmber di 42 aña di Leeuwarden, ku nan a detené tambe despues di e tiramentu, por bai kas. Segun un bosero di MP nan por bai pa motibu di “insufisiente prueba”, pero e investigashon ta andando ainda. Den kurso di e siman aki ta hiba e Yu di Kòrsou dilanti di wes komisario.

Polis a mira djasabra anochi riba Coolsingel ku un persona a lòs bala riba e persona di Gulpen, i despues e agentenan polisial a tira riba e sospechoso. A interná e dos personanan den hòspital i segun MP nan ta fuera di peliger. No ta konosí si nan ta den hòspital ainda.

A heridá un di tres persona durante e tiroteo. Ta trata di un señora ku a kai ora ku el a kore bai. Komo prekoushon a hib’é hòspital. Djis despues di e insidente a detené e hòmber di Leeuwarden riba sospecho di komplisidat.

Departamentu di Reshèrshi di Reino ta investigando e uzo di arma di kandela di polis. Esei ta un prosedura standart den e tipo di insidentenan violento aki.

Mas tempran riba e mésun djasabra ei tabatin un insidente kaba kaminda un persona a lòs un tiru ku un arma di kandela. Polis ta buskando esun kulpabel ainda. Durante e insidente aki ningun persona a resultá heridá.