ORANJESTAD – Tripadvisor a rekonosé Eagle Beach komo un di e ganadónan di ‘2023 Travelers’ Choice Best of the Best Award’ den e kategoria playa. E playa ta number unu den e tòp 25 playanan mas bunita di e área di Karibe i number dos den e tòp 25 playanan mas bunita na mundu.

Riba e lista di e tòp 25 playanan den e área di Karibe tin dos playa mas di Aruba menshoná, Baby Beach i Arashi Beach.

Eagle Beach tabata rekonosé pa basta aña kaba  komo un di e playanan mas bunita den área di Karibe, pero esaki ta pa promé biaha ku e ta pará na promé lugá, segun Ofisina di Turismo di Aruba ATA.

‘Travelers’ Choice Awards’ ta honra e mihó eksperensianan di biahe, basá riba e evaluashonnan ku usuarionan ta pone riba tripadvisor. Di e manera aki ta rekonosé e sitionan ku a ofresé e eksperensianan mas eksepshonal.