DEN HAAG – Eerste Kamer ta vota pa kabes djamars 18 di òktober riba e lei nobo ku ta ehekutá e kambio di konstitushon ku ta duna Hulandesnan ku ta biba den eksterior e oportunidat pa vota pa Eerste Kamer mediante un asina yamá kolegio elektoral. Na Hulanda ta Parlamento Provinsial ta skohe Eerste Kamer. 

E votamentu pa kabes ta riba petishon di PVV, ku no ta mira nada den e kambio di konstitushon ku a aprobá kaba. Segun PVV ta mimando e emigrantenan ku e proyekto di lei aki.

No ta tur frakshon tabatin bon palabra pa e urgensia ku kua ta tratando e proyekto di lei aki. Nan a preferá ku lo a introdusi’é ku mas koutela. SGP i SP ta preferá pa salta e elekshon pa Eerste Kamer di 2023 i laga e proyekto di lei drenta na vigor mas despues.

Proyekto di lei

E Kambio di Konstitushon ta regla ku miembronan di un kolegio elektoral, ku no-residentenan a skohe, tambe ta skohe e miembronan di Eerste Kamer.

Asina no ta solamente residentenan Hulandes tin influensia riba kompilashon di Eerste Kamer via elekshonnan di Parlamento Provinsial den Hulanda Europeo i e elekshonnan di kolegio elektoral den Hulanda Karibense, pero tambe Hulandesnan ku ta biba den eksterior. Mester traha riba e forma di e kolegio elektoral di no-residentenan pa lei. Esei ta sosodé den e proyekto di lei aki.