Notisia

Ekipo di Reino Hulandes a hunga nan promé wega di e Super Tanda

Bradenton – Ayera e ekipo di Reino Hulandes a hunga nan promé wega di e Super Tanda. Nan kontrinkante tabata e fuerte ekipo di Mexico ku meskos ku e ekipo di Reino Hulandes a kaba na di tres lugá den e promé tanda.

Den un wega hopi fuerte e ekipo di Reino a sali viktorioso ku e skor di shete pa kuater kaminda e ekipo di Reino a usa hopi strategia ku a funshoná perfekto.

E wega no a kuminsá muchu bon pa  e ekipo di Reino Hulandes. Riba pitcheo di Brandon Herbold i algun eror di e ekipo di Reino e Mexicanonan a kue un delantero di tres pa nada. Den e di kuater inning Brandon a haña relevo di Stijn van der Schaaf, kende a dominá e bateadónan Mexicano den gran forma.

Ku e bon pitcheo aki e ekipo di Reino a rekuperá den e partido. Den e di kuater inning tabata e catcher Mees Robberse ku a habri ku un doblete avansá pa tersera i e ta skor e promé kareda riba un rolling di Gedionne Marlin.

Un inning despues Alexander Albertus ta habri ku un doblete i ta anotá riba un hit di Matis Crouwel poniendo e skor na tres pa dos pa Mexico. Preshon riba e ekipo Mexicano dor di tokenan perfekto kombiná ku eror di e ekipo Mexicano ta pone ku Matis ta skor e kareda di empate.

Despues di un base por bola intenshonal pa Mees Robberse basenan ta yena. E siguiente bateador Kendrey Maduro a konektá un liña ku e segunda base no por a kontené. Sinemabrgo e ta rekuperá i ta saka Mees Robbers out. Pero Miquel Willem ta anotá riba e hugada aki i ta hasi e wega kuater pa 3.

Di seis inning tambe ta habri ku un doblete di parti di e ekipo di Reino Hulandes. E biaha aki tabata Darnel Collins ku ta konektá e doblete. Despues ta sigui un hit di parti di Alexander Albertus i base por bola pa Justin Dambruck. Matis Crouwel ta bati un bala lento ku e pitcher no por a kontrolá i ku a pone ku Collins ta skor i hasi e wega sinku pa tres.

Komo ku e strategia a funshoná Miquel Willem ta pone un toke di oro ku ta funshoná perfekto i e skor ta bira seis pa tres. E wega ta terminá ku e skor di shete pa kuater na fabor di e ekipo di Reino Hulandes.

Awe pa 4’or di atardi Reino Ulandes lo enfrentá  e ekipo di Hapon ku ayera a pèrdè kontra e ekipo di Sur Korea ku e skor di ocho pa nada, mientras ku USA a pèrdè di Chinese Taipei ku e skor di seis pa dos.

Deel dit artikel
Rocargo
Rocargo
Rocargo
Rocargo