Èks miembro di Kamer André Bosman ke sigui Rutte komo kabesante di lista 

DEN HAAG – André Bosman, anterior miembro di Kamer pa VVD, a anunsiá su kandidatura komo susesor potensial di Mark Rutte komo kabesante di lista di VVD. A hasi e anunsio den e programa di radio WNL Haagse Lobby, i ku esaki Bosman ta e promé kandidato despues ku Rutte a anunsiá su salida.

E siman aki e partido lo presentá un otro kandidato pa enkabesá lista, ya asina e miembronan tin mas eskoho. Bosman ta konosí riba e islanan pa motibu di su punto di bista i krítika fuerte  riba gobernantenan di Kòrsou.

Partisipashon

Bosman ta asentuá ku e miembronan di partido mester tin partisipashon den e rumbo di e partido i si tin mas kandidato esei ta na fabor di un bon eskoho. “Mi ta ansioso pues ken ta e kandidato ku e direktiva prinsipal lo bini kuné”, e anterior miembro di parlamento, ku ta bisa ku e no tin idea ken esaki lo ta, ta bisa.

“Mi ta hopi tempu kaba embolbí den e partido aki”, Bosman ta bisa, referiendo na su miembresia di Tweede Kamer i diferente otro ròl den e partido. “Mi ta sintimi fuertemente embolbí den e partido i tin mi ideanan fuerte.” El a pone  e presidente di partido na altura di su kandidatura.

Segun e reglamento di VVD e órgano atministrativo nashonal ta proponé un kandidato, pero otro miembro tambe por pone nan mes kandidato pa e funshon aki. Un bosero di e direktiva a duna di konosé anteriormente riba djaluna ku despues di e prosedura aki numa e lista elektoral ta bini na remarke.

Resientemente Bosman tabata riba e lista di kandidato di VVD pa Eerste Kamer. Lamentablemente su di djessinku lugá riba e lista no tabata sufisiente pa drenta Senado, ya ku e liberalnan a optené solamente djes asiento.