Eksistoso selebrashon di Dia di Tera Kòrá

KRALENDIJK – Djamars mainta 1 di ougùstùs a selebrá e dia di Tera Kòrá. E aktividat a tuma lugá na Sentro di Bario Tera Kòrá. Pa duna inisio ofisial na e apertura di dia di e bario.

Vader Marc Hooijschuur, papia i resa huntu ku tur presente. “Poko poko nos ta bai drumi ku porta será, miéntras nos a kustumbrá drumi porta habrí den pasado.  Awe nos ta selebrá dia di Tera Kòrá. E bario mester ta di tal forma, ku nos ta biba ku union pa logra hopi. Hopi kos ta den nos mes man, pero na final tambe den esun di Dios. Mi ta deseá tur hende di bario tera Kòrá un felis dia. 

Despues a presentá Danniella Drullard, ku a kanta 3 kantika di alabansa.

Diputado Hennyson Thielman, a bisa: “Nos tur ta probechá di loke otronan a hasi esfuerso pa loke nos tin awe. No solamente esnan ku ya a fayesé, pero tambe esnan presente. Awe nos ta honra dos persona ku meresé. Nos tambe tin ku konstruí pa otronan di futuro. Nos tin ku konstruí kos fuerte pa futuro. Felis dia di Tera kòrá.

Despues a honra Gibi Bomba i Jeffry Scherpton i a presentá tambe 2 hóben di arte di palabra ku deklamashon. Bubui Goeloe, di Plata Forma Tera Kòrá a papia den kuadro di selebrashon di dia di e bario. Tambe a animá e mainta Kaha di Òrgel Rincon i show di baile di parti di Monique i Dony.