KRALENDIJK- Djabièrne aworKolegio Kristu Bon Wardador lo tin nan elekshon di Reina, Prens i Pancho di skol. Esaki lo tuma lugá na e aula di SGB 6’or di atardi. 

Ta e promé biaha ku e skol lo bai organisá un elekshon asina. Meta di e aktividat ta pa Kolegio Kristu pa rekaudá fondo pa por forma parti di e marchanan hubenil 2023. 

“Despues di dos aña sin por selebrá karnaval Kolegio Kristu Bon Wardador ta kla pa retomá e aktividatnan sosial, kultural pa e goso di nos muchanan. Ta asina ku for di aña pasá preparativonan ta tumando lugá pa e diferente aktividatnan di karnaval manera e elekshon di Reina, Prins i Pancho di djabièrne 13 di yanüari”, asina e skol a komuniká den un komunikado pa prensa djadumingu atardi. 

11 mucha

Un total di 11 mucha entre 5 pa 12 aña lo ta den e kontienda pa e elekshon di skol. Aki ta trata di 3 reina infantil kual ta  Candra Martijn, Sophie Coffie i Amelie Prado Klinger. Den e kategoria di reina hubenil nos tin Elizabeth Prado Klinger i Nairoby Cecilia. Nos duonan pa prins i pancho ta Ian Doran huntu ku R’Zhiön Josephia, Riczard i Riandro Thielman i por ultimo Roman-Shane Emerenciana huntu ku su pancho Kishandro Martijn.