WILLEMSTAD – Empresarionan den sektor turístiko ku ta hür akomodashonnan mas chikitu tin problema a konsekuensia di e preis di pasashi haltu riba e ruta Amsterdam-Kòrsou. Esei CASHA, e organisashon prinsipal di e empresarionan chikitu den turismo, ta bisa. 

E kresementu di e kantidat di paketanan di biahe pa preis di baka flaku ta motibu ku, segun e organisashon, ta bende e stulnan ku a sobra mas karu ku tabata e kaso promé. Na e momentu aki ta mas barata pa buk un kombinashon di buelo plùs hotèl na Corendon na lugá di kumpra solamente e pasashi na KLM, mientras bo ta den e mésun avion.

E preisnan karu di pasashi tin konsekuensia pa e uso di kapasidat, CASHA ta bisa. Na luna di dezèmber e okupashon promedio serka e akomodashonnan tabata 71 porshento. Esaki ta nuebe porshentu ménos kompará ku e luna promé i tambe ku dezèmber 2021.

Poblashon lokal

E problema di preis di pasashi no ta afektá solamente e turista ku ta skohe pa un akomodashon mas chikitu. E ta un problema tambe pa e poblashon lokal ku segun CASHA ta dependé di pasashi lòs pa bula bai Hulanda.

Sandals tambe ta kumpra stulnan di avion riba rutanan di American Airlines for di Estados Unido. Ku konsekuensia ku einan tambe e pasashinan a bira sentenares di florin mas karu.

For di e  resúmen ku CASHA a kompilá ta sali na kla  ku tin diferensia di preis entre Kòrsou komo destinashon i otro destinashonnan similar. Tambe tin un diferensia grandi entre Kòrsou òf Amsterdam komo lugá di salida.

KLM ta bula entre otro mas barata pa Miami ku pa Kòrsou. American ta bula mas barata pa Aruba ku pa Kòrsou i kasi no tin diferensia entre un pasashi Miami-Kòrsou i Miami–Madrid.

CASHA tin awor 77 miembro entre kua tin sinku  doño di akomodashon, shete  kompania di hür outo, shete  skol di buseo i djeskuater  taksi i kompania di ekskurshon i atrakshon.