Kralendijk – Entidat Públiko Boneiru (EPB) a lansa su wèpsait nobo. Awor bo por  traha un sita online ku Registro Sivil pa un deklarashon di nasementu, un petishon pa un pasport nobo òf pa un reibeweis. Empresarionan tambe por pidi nan lisensianan via e wèpsait nobo akí. E adrès di e wèpsait ta keda meskos, www.bonairegov.com. E wèpsait ta yená ku informashon na papiamentu i hulandes. Tambe e wèpsait ta habri riba bo tablèt i selular i e ta fásil pa usa. Habitantenan tin akseso na tur tópiko ku ta relevante pa nan bienestar.

E kontenido ta mas aktual, e struktura ta mas moderno i tin akseso na mayoria servisio di EPB. E wèpsait ta duna suidadanonan servisionan ku no tabatin den pasado. Si bo tin mester di un ‘Deklarashon Tokante Kondukta’ (e asina yamá VOG), bo por djis klek riba e boton i hasi bo petishon digital. Turistanan na Boneiru tambe por lesa informashon tokante kultura di Boneiru riba e wèpsait.

 “Den futuro usadó di e wèpsait di EPB por wak online kon ta pará ku petishon hasí na EPB. Si bo a hasi un petishon pa un pasport lo bo por wak e online. E meta ta pa otro aña habitantenan òf empresarionan por hasi tur petishon digital nan mes. Esnan ku tin mester di yudansa riba tereno digital lo haña esaki”, diputado Hennyson Thielman a bisa.

Digitalisashon na Boneiru ta birando mas importante den nos bida diario. EPB lo bini pronto ku un programa di Digitalisashon Inklusivo. E programa akí ta pa esnan ku no tin e maña pa traha ku kòmpiuter, telefòn i/òf internèt. Un parti di e programa ta kon pa hasi bon uso di selular, internèt i kòmpiuter. Tur hende lo por risibí yudansa na diferente sentro di bario pa asina tur hende por disfrutá di e desaroyo di digitalisashon akí.

E wèpsait ta bira EPB su lokèt digital ku ta habrí 24 ora pa dia. Nos habitantenan por regla nan asuntunan den un forma digital. Tira un bista riba e wèpsait: www.bonairegov.com.

---

Lesa tambe:

• 
  Por deskubrí historia di antepasadonan ku e buki ‘Archivo Spièrtá’
• 
  ZJCN ta introdusí mehorashon den seguro médiko pa islanan BES 
• 
  Marco van de Kreeke bèk na aeropuerto Flamingo komo di dos direktor 
• 
  Otro charla mas pa mayornan tokante uso seif di medionan sosial serka mucha
• 
  Entrega di Kalènder 2025 “Ban Topa Nos Grandinan” na Gezaghèber John Soliano