Pa por ofresé tur su servisionan bou di un solo dak

KRALENDIJK – Entidat Públiko Boneiru na kuminsamentu di 2022 ta bai ofresé tur su servisionan bou di un dak. Ta trata di entro otro servisio di pago, petishon, pèrmit, aplikashon, informashon etc. Pa por realisá esaki ta trahando riba un Sentro di Servisio, un asina yamá KCC (Klant Contact Centrum).

E intenshon ta pa na e Sentro di Servisio akí siudadanonan yega pa regla tur nan asuntunan di gobièrnu bou di un solo dak, sin ku mester bai diferente lokashon pa regla esakinan. E sentro lo bai tin un karakter servisial i proaktivo. Kier men, promé ku bo dokumentunan manera sédula of pèrmit kaduká, bo ta keda informá adelantá i na tempu pa renobá esakinan.

Tambe e Sentro di Servisio ta bai funshoná komo un ‘E-loket’, un lokèt elektróniko. Si bo no por pasa físikamente bo por yama, whatsapp òf chat ku e Sentro di Servisio. E sentro lo bai brinda e fasilidat pa bo wak online kiko státùs di bo petishon òf dokumentunan ta. E portal di e Sentro di Servisio ta bai yama miboneiru.com i bo por hasi bo aplikashon tur ora, 24 ora pa dia, 7 dia pa siman riba kualke aparato digital.

Pa nos grandinan i personanan ku un desabilitashon físiko, e Sentro di Servisio lo duna e servisionan di gobièrnu te na kas òf na kas di kuido. Tambe e Sentro di Servisio lo ehekutá kampañanan di konsientisashon kon pa usa sistemanan digital i lo pèrkurá pa duna treinen relashoná ku uso di sistemanan digital òf kon pa apliká pa e servisionan di Entidat Públiko Boneiru.

“Ya pa basta tempu ta papia di un sentro kaminda un suidadano por bai i atendé tur su kosnan na gobièrnu. Porfin awor akí nos ta bai hasi esaki realidat i perkurá ku suidadanonan ta bai risibí un servisio mihó i efisiente di gobièrnu. Den e presupuesto di 2022 a presupuestá fondonan pa por instalá e Sentro di Servisio. E proyekto aki ta forma parti di e proseso di digitalisashon di e aparato públiko i lo sòru pa suidadanonan keda kla mas rápido,” segun diputado di desaroyo ekonómiko Hennyson Thielman.

Entidat Públiko Boneiru ta antisipá ku introdusiendo e Sentro di Servisio akí, e servisionan na komunidat boneriano ta bai mehorá. E servisionan lo ta aksesibel i fásil, i e státùs di tur petishon lo ta konosí na tur momentu.