Notisia

Entidat Públiko Boneiru ta lansa programa pa kapasitá empleadonan lokal

Direktora di Forma, Soraya Menché huntu ku diputado Den Heyer i Thielman | Pòtret: EPB

Kralendijk – Entidat Públiko Boneiru a sera un akuerdo di kolaborashon ku FORMA pa duna kurso pa empleadonan lokal. Meta di e programa di desaroyo ta pa kapasitá empleadonan lokal (mas aleu) i pa medio di esaki ofresé nan mas oportunidat pa sigui krese riba merkado laboral. E programa di desaroyo tin komo meta tambe pa stimulá sektor privá pa hisa salario. 

Aktualmente mas òf ménos 4000 persona ta traha den sektor turístiko, e sektor mas grandi na nos isla. E kursonan ta enfoká na promé lugá riba empleadonan den sektor di hospitalidat i despues ta sigui kurso pa empleadonan den otro sektornan. ‘Den e Plan Maestro Stratégiko pa Turismo i e Plan di Rekuperashon pa Turismo a stipulá ku ta apsolutamente nesesario pa sigui desaroyá e kapital humano di Boneiru. Ku e kursonan akí nos ke logra ku empleadonan den sektor di hospitalidat ta haña mas kapasidat, bira mas ábil den ehersementu di nan profeshon i mira esaki bèk den nan rekompensa’, segun diputado Hennyson Thielman.

Fundashon FORMA ta un sentro di kapasitashon pa edukashon di adulto i ta bai duna i kordiná e kursonan den kolaborashon ku vários empresa di hóreka lokal. ‘Ta importante ku adultonan tambe ta haña oportunidat pa por sigui desaroyá nan mes riba nan tereno’, asina diputado Nina den Heyer a indiká.

Programa

E kolaborashon entre FORMA i Entidat Públiko Boneiru ta produkto di un palabrashon den e programa di gobernashon di Kolegio Ehekutivo di Boneiru 2019 – 2023; un di e prioridatnan ta pa pone un plan di formashon riba pia den kolaborashon ku e stakeholdernan. E programa di lès ta konsistí di un kombinashon di diferente treinen, outoestudio i akumulá eksperensia den práktika. Entidat Públiko Boneiru ta paga e gastunan pa e kursonan a base di e kantidat di partisipante. Kada kurso ta dura entre 8 pa 20 siman a base di 1 òf 2 biaha pa siman i entre 12 pa 20 persona por partisipá na kada kurso.

Dentro di poko ta sigui mas informashon tokante e tipo di kursonan i e fechanan riba kua nan ta kuminsá. 

Deel dit artikel
Rocargo
Rocargo
Rocargo
Rocargo