KRALENDIJK- Sabadeco ta e bario ku e entrada mas haltu na Boneiru. Esaki ta sali na kla for di sifranan ku CBS a publiká resientemente pa loke ta trata e 2011 pa 2019. 

Otro barionan ku tin entrada relativamente haltu ta Belnem, Santa Barbara, Nawati Nort i Lima. Na otro banda, por mira ku Entriol Pariba -tampoko soprendentemente- esun ku entrada mas abou. Otro barionan ku entrada familiar relativamente abou ta Entriol Pabou, Nikiboko i e parti Nort di Rincon. 

Komparashon

Pa por a hasi su komparashon, CBS a wak varios datos, entre otro formulario di belasten, informashon di valor di kas i informashon di Piva. Na Sabadeco e promedio di entrada ta den kareda di 57.000 dòler, mas ku dos biaha mas haltu ku e entrada familiar promedio den bario de Antriol Pariba ku ta apenas 26.200 dòler. 

CBS ta menshoná si ku e sifranan no ta kompletamente kla ainda; un parti di e datosnan usá ta trata di estimashon.