Kralendijk – Studiantenan di MBO Bonaire di e estudionan Helpende Zorg en Welzijn i Medewerker Sport en Recreatie bou di guia di nan dosentenan ta ehekutá e bunita proyekto ‘Adoptie grootouder Nelly Clarinda- Kock’ ku ya pa di tres aña eskolar ta un éksito.

E aña akí banda di e aktividatnan kustumbrá den kuadro di e proyekto, a bini ku e inisiativa pa diseñá un kalènder di aña 2025 ku potrèt di diferente hende grandi adoptá. Meta di esaki ta pa inspirá pueblo di Boneiru i asina logra bende tur kalènder i rekoudá fondo pa organisá un aktividat grandi di ‘Ban topa’ pa un kantidat mas grandi di hende di edat avansá na Boneiru durante e promé kuartal di aña 2025. E enfoke ta pa hasi mas hende grandi felis ku kisas ta nan so na kas durante gran parti di dia.

Kalènder 2025 Ban “Topa Nos Grandinan”  ta resultado di un trayekto artístiko kolaborativo ku a haña bida. Na kada luna den e kalènder por atmirá potrèt bunita ku ta ilustrá kiko nos hende grandinan a nifiká pa nos i pa e komunidat di Boneiru pa medio di e esensia di ken nan ta òf e fishi ku nan a ehersé durante hopi aña. Di e manera akí tesoronan di pasado ta inspirá nos komunidat di futuro.

E inisiativa pa e proyekto ‘Adoptie grootouder’ a lanta kaminda Estebanda (Nelly) Clarinda- Kock a inspirá dosente Suzette (Suzy) Bergland- Balentin pa bini ku un proyekto kaminda studiantenan di nivel 2 den e deparamentu Dienstverlening ta siña kon pa apresiá i kuida personanan di edat avansá dor di adoptá nan durante un aña. 

Durante e aña eskolar kada studiante ta adoptá un hende grandi i ta mantené kontakto kuné pa asina hasi bishita regular na nan kas. Tambe nan ta organisá diferente aktividat na skol kaminda tur e hende grandinan adoptá ta biní huntu pa asina keda aktivo i pasa ratunan ameno den kontakto ku otro.  Na final di e aña eskolar, e hóbennan ta traha un buki di bida di e mama òf tata grandi ku nan a adoptá. 

Señora Nelly komo inspirashon tras di e proyekto tambe a partisipá komo e promé hende grandi ku a inskribí. Durante e di dos aña eskolar señora Nelly tabatei na e apertura ofisial pa siguiente mainta fayesé repentinamente. 

Durante e bishita, studiante Tyshaini Keller di MBO Bonaire na nòmber di henter su grupo a hasi entrega di e kalènder na Gezaghèber John Soliano, den presensia di dosentenan Suzette Bergland-Balentin i Dietrich Winklaar.