Notisia

Entrevista ku gezaghèber nobo John Soliano: ‘Integridat i inklushon ta importante pa mi’

Na opinion di gezaghèber nobo John Soliano, un gezaghèber mester uni hende i órgano. Pòtret: John Soliano

John Soliano ta e gezaghèber nobo di Boneiru, kuminsando dia promé di ougùstùs. Na e momentu ei, Soliano lo sigui e aktual gezaghèber interino Reynold ‘Nolly’ Oleana. Ku e nombramentu di Soliano, e pregunta ta surgi: Kiko Boneiru por spera di su gezaghèber nobo? Redakshon di ABC Online Media a hiba un entrevista ku  Soliano.

E búskeda di Boneiru pa lorga nombra un gezaghèber nobo tabata unu bastante largu. Na mart 2023, e anterior gezaghebber, Edison Rijna, a despedí. Despues di esei, Boneiru tabata den man di gezaghèber interino Oleana. Un tarea ku su retonan. Oleana a keda konfrontá entre otro ku e kalamidat di petroli ku a yega kosta i awanan di Boneiru, i un kandela grandi na kuskus. Gezaghèber nobo, manera ya ta konosí lo bira John Soliano, 52 aña di edat, nasé i lantá na Boneiru i biniendo originalmente for di Rincon.

“Mi a traha un tempu kòrtiku komo konsehero independiente despues di un karera largu den sektor di utilidat. Mi a traha ámbos den sektor privá i den sektor públiko. Komo ku mi ke ta di balor pa mi isla, mi a skohe pa solisitá pa bira gezaghèber.”

Soliano den entrevista ku ABC Online Media ta kompartí su pensamentunan despues di su nombramentu. “Den último tempunan aki mi ta tende hopi hende riba nos isla ta ekspresá nan malkontentu ku sierto kos, i tambe nan opinion kiko lo mester bai diferente.  Mi tambe por a hasi esaki. Pero mi no ke sinta na banda i mira òf komentá so. Tumamentu responsabilidat ta bini ku un riesgo. Por ehèmpel, lo tin mas atenshon públiko pa ku mi persona. Pero pa yuda e isla bai dilanti, mi ke traha duro.” Soliano lo fungi komo gezaghèber den promé instansia pa un periodo di seis aña.

Gezaghèber mester uni

Ku Soliano komo gezaghebber, e pregunta ta kiko e pueblo di Boneiru lo por spera. Ku un orguyo notabel, Soliano ta bisa: “Mi a nase i a lanta na Rincon. Aki ta e kuna di nos kultura Boneriano. Ounke mi ta biba na Playa awor, mi no lo lubidá esaki nunka. Ademas, mi ta mira mi mes komo un hende ku ta uni. Krea relashon i nètwèrk ta esensial pa mi. E ta e base pa un rèspèt mutuo.”

Ku e nombramentu di Soliano komo e nobo gezaghèber, Boneiru ta parse di a skohe un hende hopi neutral. “Mi preferensia polítiko ta personal i privá. Nunka mi tabata inkliná pa a kompartí esaki. E echo ku mi ta neutral, semper a yuda mi den tur mi funshonnan.

Gezaghèber

Kiko ta e funshon di gezaghebber di Boneiru? Esaki por wòrdu mirá komo un funshon manera esun di promé minister na Hulanda? Segun Soliano, e funshon di gezaghèber mester wòrdu mirá diferente: “Tin un pensamentu eróneo ku e gezaghèber ta manera e presidente di Boneiru. Den Wet Openbare Lichamen BES (WolBES) tin órganonan di gobernashon manera e Koneseho Insular, Kolegio Ehekutivo i e Kiescollege. E gezaghèber ta e  di kuater órgano, i tin un ròl pa unifiká tur e órganonan aki. E gezaghèber ta presidí Konseho Insular, Kolegio Ehekutivo i alabes ta esun ku mester protehá integritat, seguridat i órden públiko. Tur esakinan ta asuntonan mas grandi ku polítika. Esaki ta un diferensia importante kompará ku Hulanda, kaminda e promé minister ta esun ku ta polítikamente responsabel pa gobièrno.”

Ekspektativa i reto

“Nos ta bibando den tempunan interesante,” Soliana ta sigui bisa. “E funshon ta multilateral. Rònt mundo, inkluso na Boneiru, e konteksto polítiko ta kambiando. Komo gezaghebber, bo tin ku perkurá pa tin inklushon i diversidat. Eseinan ta puntonan importante pa mi. Mi ta kere tambe ku Entidat Públiko mester bira mas atraktivo komo un dunadó di trabou. No solamente pa hendenan lokal, si no pa tur hende ku ke traha riba nos isla.”

Boneiru ta eksperenshando un kresementu grandi di su poblashon, kaminda ku e kantidat di hendenan ku a nase aki, ta birando relativamente mas chikí. Un tendensia ku tin probabilidat pa sigui den e tempu benidero, i lo pone ku Soliano tin su mannan yen. “Mi ta mira esaki komo un maneho ku nos tin ku hiba. Pa mantené e balansa, esaki ta e meta. E preshon riba merkado di bibienda ta subiendo. Nos mester yuda sigurá bienestar di tur hende ku biba aki na Boneiru. Esei ta e nifikashon di inklushon pa ami. Diskushon tokante etnisidat di hende por kondusí na polarizashon. Nos mester ta hopi kouteloso ku esaki.”

Integridat

Mantenshon di integridat ta algu ku ta hañando hopi atenshon últimamente den kalke organisashon. No solamente na Boneiru, pero  mundialmente esaki ta un tema sensitivo.

Pa Soliano, integridat ta fundamental: “Integridat ta kuminsá na bo mes. Bo mester duna e bon ehèmpel. Integridat no ta manera un lista, kaminda bo por djies hak af ora bo kumpli ku algu. E ta un komportashon i un manera di biba. Na Entidat Públiko tin un departamentu spesial ku tei pa yuda sigurá integridat. Esaki ta algu relativamente nobo. Pa reinforsá integridat den aparato públiko ta algu ku ta tuma su tempu, i ku ta rekerí pasenshi.

Visión di futuro i resultado

“Mi ta komprondé ku hende ke mira resultado konkreto,” asina Soliano ta bisa. “Pero riba termino korto, ta importante pa tin klaridat na di unda nos ta pará, i kiko e prioridatnan mester ta. Bon gobernashon i e aspekto di integridat ta prosesonan di término largu, ku ta rekerí atenshon kontinuo. Mi lo indiká na su debido tempu, kiko ami ta mira komo prioridat, ta i kua direkshon nos lo bai. Na unda ami lo ke logra resultado komo gezaghèber? Esaki mi no por bisa ainda. Mi lo bini ku mas informashon despues di 1 di ougùstùs. Mi ke evitá pa bini ku ponensianan populista na e momentunan aki.”

Deel dit artikel
Rocargo
Rocargo
Rocargo
Rocargo