ORANJESTAD – Eskritor di buki di mucha Olga Buckley ta partisipá na siman di buki di mucha na Aruba. Ta tene e di 30 edishon di Festival di Buki pa Mucha den e promé siman di novèmber ku e tema Biba Natura-Lesa!

E Siman di Buki pa Mucha ta e evento anual mas grandi di Biblioteka Nashonal di Aruba. E tin komo meta pa stimulá e muchanan pa lesa.

Olga Buckley ta bini di un famia grandi di djesun yu, shete mucha muhé i kuater mucha hòmber. Su tata tabata prosedente di Grenada i su mama di Venezuela. El a nase i lanta na Aruba i a biba algun tempu pa su estudio pa maestra tantu na Kòrsou komo na  Hulanda. E tin tres yu muhé i tres ñetu hòmber. Komo mama i welita el a kompartí semper su pashon pa lesa ku su yu- i  ñetunan. Awor Olga ta penshoná.

Den su periodo ku e tabata traha komo maestra, Olga tabata konta su alumnonan hopi kuenta, ku hopi biaha e tabata inventá na e momentu ei i despues di skol e tabata skirbi nan ku un pòtlot den un skref. E storianan aki a forma e base pa e seri di buki Bencho ku el a kaba di finalisá ku éksito. 

Ku Ami, Bencho (2021) Olga Buckley a finalisá su seri di buki, Bencho Kock, pa hubentut. E seri ta sigui e mucha hòmber Rubiano, Bencho, repartí den sinku parti konsekutivo for di skol básiko te enseñansa avansá. Un persona ku a desaroyá di un mucha chikitu tímido i dudoso te un persona sigur di su mes.

Konsiente di e importansia pa promové lesamentu ku un públiko mas grandi, el a skohe komo tema pa su tésis pa su estudio di Papiamento ‘Plaser den lesamentu i su bentahanan’. El a dirigí  e proyekto pa promové lesamentu ‘Bon Nochi Drumi Dushi’, hasiendo hopi investigashon pa e por ta sigur ku e loke ku e ta trese dilanti den su tésis tabata sientífikamente  hustifiká i a inkorporá e proyekto tambe den su tésis.

Na aña 2020 el a haña un kondekorashon real pa e proyekto i su trabou riba tereno di promové lesamentu. Banda di outor Olga Buckley ta poeta tambe.