WILLEMSTAD – E konosido eskritor i aktris di Kòrsou, Diana Lebacs a bai sosegá ayera. E tabata malu algun tempu kaba i tabata na hospice Arco Convent. Lebacs a hunga un papel importante den kresementu di literatura pa hubentut di Antia Hulandes i komedia na Kòrsou.
For di su 23 aña e tabata skirbi tantu na Papiamentu komo na Hulandes. Pa e buki Nancho van Bonaire el a risibí na 1976 e ‘Zilveren Griffel’ komo promé eskritor ku no ta di Europa.
Lebacs tabata di desendiente Europeo, Kurasoleño, Surnameño i Indjan. E tabata maestra di skol, kabes di skol, instruktor i entrenadó pa inovashon den enseñansa. Banda di esei e tabata kontadó di kuenta, eskritor/produktor di komedia i e tabata aktivamente enbolbí den stimulá i entrená talento lokal nobo pa skirbi.
El a obtené su Bachelor of Education den idioma Papiamentu na Fakultat General di Universidat di Antia Hulandes. Banda di Zilveren Griffel el a haña tambe na aña 2003 Premio kultural di Prins Bernard Cultuurfonds di Antia Hulandes i Aruba pa su buki Caimuns geheim.
Na aña 1994 a sali su promé obra pa adulto titulá: De langste maand (In de Knipcheer, 1994), ku ta deskribi e ambiente hororoso di adikshon na droga i desempleo na Korsou.
Publikashonnan resien ta un buki di plachi na Papiamentu, Fula fula (2005, edishon Rotary Korsou), Vrouwen aan het woord: Waarover we niet moeten praten (2007, In de Knipscheer). Unda Olivier ta/Waar is Olivier? (2009) ta su buki pa mucha resien na Papiamentu i Hulandes, emití pa Fundashon Sembra Buki na Korsou.
Diana Lebacs tabata kasá ku Pacheco Domacasse ku a fayesé na mart último. E tabatin 74 aña.
‘Leerorkest Bonaire’ na Kolegio San Bernardo ta duna su promé presentashon
Kantidat total di kontagio a baha 21% den un siman di tempu
UNKOBON a risibi aklarashon di tur 6 partido politiko
Segun kambio di lei: Lo no mag suta ningun mucha mas na islanan BES
