KRALENDIJK/WILLEMSTAD- E kompania di aviashon lokal EZ Air, ku basenan operashonal na Kòrsou i Boneiru, lo bai agregá mas buelo entre nos islanan i Colombia. Esaki minister di ekonomia di Kòrsou, Ruisandro Cijntje, a informá den transkurso di djaluna, despues di a topa ku gerensia di EZ Air durante un bishita na Colombia. 

Direktor general di EZ Air, René Winkel a elaborá riba e oportunidatnan ku ta eksistí entre Colombia i Kòrsou i e momentu oportuno pa nan kompania por sigui krese. 

Minister Cijntje a agregá ku tin hopi interes bou di habitante nan di Colombia, Brazil, Argentina i mas paisnan den Latino Amérika pa bishita Kòrsou. Ku buelonan adishonal entre Colombia pa Kòrsou, nos por ta aun mas aksesibel pa e area aki i brinda nos yunan di tera i tambe e Kolombianonan ku ta biba na Kòrsou, e oportunidat pa por biaha den region. 

Krese

Minister Cijntje a finalisá e kombersashon felisitando Winkel i a bisa di ta wak dilanti pa un relashon di trabou ku por sigui krese.