KRALENDIJK/WILLEMSTAD- E kompania lokal EZ Air lo kuminsá ku su buelonan regular pa Medellin for di 3 di desèmber 2021. Esaki e aerolínea a anunsiá awe riba su página di Facebook.

EZ Air tin hopi tempu ta preparando kaba pa kuminsá sirbi e ruta aki. Ya e kompania tin algun tempu ta bulando pa Barranquilla, den departamento Atlantico. Aunke tabata tin hopi interes semper den buelonan pa Medellín e avionnan Beechcraft no tabata totalmente ideal pa kubri e ruta ei.

De lunanan ku a pasa, EZ Air a atkerí 2 avion mas grandi di marka Saab, ku si ta mas ideal pa kubri e ruta aki. Despues di un periodo di treinen i un proseso atministrativo pa keda kla ku tur papel, awor si e yega e ora ku EZ Air por start benta di su pasashinan pa e ruta.

Pasku

Mesora e kompania a kuminsá promoshoná biahenan pa temporada di Pasku i aña nobo ku un kampaña “Celebremos Navidad i año nuevo en Medellin”. Segun direktor di EZ Air e reakshonnan riba anunsio di e buelonan ta hopi positivo. “Ta hopi tempu hende ta puntrando nos ki dia nos ta kuminsá bula e ruta i hopi hende a yama nos pa yama nos pabien ku e logro aki. Nos mes ta sumamente kontentu”.

Ekipo

E direktor a bisa di ta hopi agradesido na e tim di EZ Air. “Tur hende di nos ekipo a traha hopi duru, sin eksepshon”, pa nos por a keda kla ku e siguiente paso aki pa nos kompania. Entre otro, e pilootnan di EZ Air mester a sigui treinen pa bula ku e avion nobo, mekanikonan mester a wòrdu di train i mester a tuma personal di kabina na servisio.

Por chek preis di pasashi ònline via www.flyezair.com, i por yama tambe ofisina na Kaya Italia riba number 717 1900 pa mas detaye i reservashon. Lógikamente por pasa personalmente tambe na e ofisina pa hasi e kompra.