BOGOTA- EZ Air for di djarason ta presente na Bogotá, kaminda e kompania ta parsisipá den Vitrina Turística ANATO, e evento turístiko mas grandi na e país. 

Den diferente entrevista ku ela hiba kaba, vise presidente di EZ Air, Sueyenne Dammerman ta splika ku e islanan ta hopi atraktivo pa turista kolombiano i ku, aparte i Kòrsou ta fásil pa bula pa Boneiru i Aruba tambe ku EZ Air. 

“Nos tin playa bunita i Boneiru ta rekonosé mundialamente komo un di e destinonan mihó pa sambuyá, asina Dammerman ta bisa den un entrevista pa un stashon di televishon lokal. Tambe Dammerman ta konta televidentenan ku e islanan ta ‘hopi dushi’. 

Medellín

Aunke ku EZ Air relativamente resien a kuminsá ku su buelonan pa Medellín, e aerolínea ya tin mas ku dos aña ta bula pa e siuidat di Barranquilla na Costa Atlántico, ku ta un destinashon basta popular riba nos islanan. 

Resientemente EZ Air a kuminsá bula tambe ku avionan Saab mas grandi ku ta karga 34 pasahero, kompará ku 18 pasahero ku e avionnan anterior tabata karga. E aerolínea ta bisa di a haña hopi komentario positivo di pasahera pa ku komodidat di e avión mas grandi ku por sierto ta mas espasioso i k uta bula hopi stabil.