ORANJESTAD – Un famia ku dos yu na Aruba tabatin mester di 5.363 florin pa yega fin di luna. Esei ta 422 florin mas ku un aña pasá na luna di yanüari 2022. Pa hasi e mésun kompra awor, mester di kasi nuebe porshentu mas na entrada.

Esei ta resultado di e raportahe di inflashon mensual di Ofisina Sentral pa Estadista CBS.

Un kas di un persona na Aruba tabatin mester di 211 florin mas (pa ta eksakto 2.554 florin) pa luna na yanüari kompará ku e aña anterior. Tin un bahada leve si kompará ku luna di dezèmber.

Inflashon

Preisnan na Aruba a subi na luna di novèmber promedio 0,3 porshento kompará ku luna di dezèmber 2022. Kompará ku un aña pasá e preisnan a subi 6,6 porshento.

Shete di e djesdos sektornan ku a midi pa identifiká e kambionan di preis a konosé subida di preis.

Maneho di un kas a bira kasi shete porshento mas karu, spesialmente aparatonan doméstiko ku mas ku djesdos porshento. Pero paña i sapatu a baha kasi djes porshento na preis.

Makutu di kompra

E makutu di kompra ku CBS ta usa pa midi inflashon ta konsistí di 408 produkto i servisio. Algu mas ku mitar, 234 produkto a bira mas karu na yanüari, mientras 133 produkto a bira mas barata. 41 produkto a keda igual.

CBS ta wak tambe spesífikamente e makutu ku produktonan di energia. E makutu di awa, koriente, gasoline i disel a subi ku mas ku djessinku porshento na yanüari. E makutu di kuminda a subi ku mas ku djesun porshento.