Fase 3 di drechamentu Kaya Korona ta kuminsá e siman aki

KRALENDIJK – Despues di un tempu di espera, Kaya Korona e parti di kaya fase 3, a yega na turn pa wòrdu drechá Despues di hopi aña ku a renobá un parti di Kaya Korona, e tempu aya a bisa ku ta parti e kaya den tres, a drecha parti 1 i 2, awor ta sigui ku e di 3 parti. 

“Awe nos ta kontentu ku ta bai inisiá ku e trabounan pa fase 3 di Kaya Korona. A drecha Kaya Korona den diferente fase i awor e último parti. Trabou ta kuminsá e siman aki. E trabou ta grandi i ta dura  4 luna, den diferente fase” asina diputado Hennyson Thielman a splika. 

Diputado a splika tambe ku tabata importante pa kaba ku e drechamentu di Kaminda Djabou, ya ku esaki ta bai wòrdu usá pa desvía tráfiko na momento ku parti di Kaya Korona ta será. Según Thielman, pronto tambe lo bai kuminsá na e área di Tanki Matrimonio. 

Roy Martina di parti di direktorado di R&O a papia di e montante i informashon di loke ta enserá pa e trabounan. El a papia di plannan ku tin pa drecha tur òf mayoria kaminda na Boneiru. “A tene kuenta ku Kaya Korona fase 3, pa evitá ku outo no por yega na negoshinan. No ta bai uza solamente asfalt pero tambe otro material pa drecha kaminda. Ya tin prueba ku esei ta duna bon resultado proba. No solamente klenku, pero tambe material resiklá. 21 kaya ta bai haña atenshon awor.”

Paso

Finalmente Norvil Bartholomeho di parti di BWM tambe a duna un splikashon di e trabounan k uta bai wòrdu hasi dor di e kompania: “25 di yüli ta kuminsá ku kobamentu pa tin un bon idea kon e fundeshi ta. Djárason ta sera parti di e kaya Korona. Ta bai pone pipa di reserva si ta nesesario pa usa den futuro. Ta bai drecha asera tambe”, asina Bartholomeo a splike, agregando ku e trabounan lo tuma sigur un 4 luna pa por wòrdu termina.