WILLEMSTAD – Ministerio di Salubridat mester kontrolá Selikor riba areglonan ku gobièrnu ta traha ku e servisio ku ta kolektá i prosesá sushi. Esei ministerio di Finansas ta informá. E ta haña ku Selikor no a kumpli ku tur palabrashon pa kumpli ku e di dos pago di sosten pa likides.

Sinembargo e ta haña awor 4.8 mion florin, pasobra e ministerio di Salubridat ta bisa ku e ta kontentu ku e trabou di Selikor.

Ministerio di Finansas no ta di akuerdo ku esei. Por ehèmpel no a kumpli ku e palabrashon  ku pa luna Selikor mester limpia binti bario minusiosamente. Falta sinku bario riba e lista di Selikor, ku si tabatin prioridat di ministerio di Salubridat. 

Ministerio di Finansas ta konsehá Selikor pa, durante di e akshonnan di limpiesa,  saka pòtrèt di e personal/kontratista di e trabou pa registrashon.

Embolbí 

Tambe e ministerio di Salubridat por tuma e tarea riba dje pa embolbí e komunidat mas den e proseso, ofresiendo e posibilidat pa pone pòtrèt i testimonio riba e página wèb/Facebook di e ministerio.

Esakinan ta maneranan práktiko i fásil di apliká pa dokumentá i responsabilisá e trabounan hasi, segun e ministerio di finansas.

Responsabilisashon 

Finansas ta konstatá ku aparentemente Selikor no ta kustumbrá pa duna kuenta i rason ámplio. Por nota esei na e entrega lat di e  relatonan di aña ku a kontrolá i e asina yamá raportahenan di gerente ku nan no ta entregá kompleto.

Den e raportahenan di gerente mester inkorporá por lo ménos e progreso di e plan di aktividat, inkluso eventual medidanan di korekshon pa realisá e metanan i/òf rekuperá retrasonan.

Promé ku ratifiká e konsepto di e plan di aktividat, e ministerio di GMN mester e definí e gastunan mará na esaki huntu ku e ministerio di Finansas.

Kambio di kultura 

E ministerio di Finansas ta konvensí ku semehante kòntròl di trayektonan lo stimulá un kambio di kultura dentro di Selikor, kaminda Selikor lo duna kuenta i rason proaktivo na su plataforma di partinan interesá entre kua na promé lugá e komunidat di Kòrsou.

Pa bini na remarke pa e di tres pago di sosten di likides Selikor mester kumpli ku tur eksigensia, Finansas ta atvertí. Tambe Selikor mester responsabilisá kon a gasta e sèn di e dos pago. Ministerio di Salubridat i Medioambiente mester duna guia i kontrolá ku e trabounan di Selikor ta sosodé na tempu.