Evento i farándula

Flavio Maestroni ganadó den kompetensia di tiru

KRALENDIJK – Djasabra 30 di mart 2024, Tirabon a tene un kompetensia di e deporte di tiru den kuadro di e  segundo edishon di “Bonaire international sport week” organisá pa INDEBON.

Promé ku e kompetensia a tuma lugá inougurashon di e kancha di tiru di Tirabon ku a haña e nòmber, Arthur Enrique Mauricio. Vice-presidente di Tirabon, señor Peter Silberie a hiba un diskurso na unda ku el a rekordá Arthur, den felis memoria, promé ku su fayesimentu e tabata un motor grandi pa loke ta tiru na Boneiru i pa tene esaki aktivo tantu lokal komo internashonal. Tambe señor Silberie a sigui bisa ku Tirabon, den tempu di Antias sèmper a saka kara di Bonaire tantu lokal komo internashonal. Despues di e kambio estatal a bini algun kontratempu, ku a pone ku Tirabon no por a sigui tene e deporte di tiru aktivo na Bonaire debí ku a kita e pèrmit di arma. Pero ku hopi lucha nos a logra keda kla ku tur e eksigensianan legal ku tremendo koperashon di Kuerpo Polisial, Gabinete di Gezaghebber i Minister di Seguridat i Hustisia. 

Den presensiá di invitadonan i famianan di Arthur, señora Idra Mauricio, kasá di señor Mauricio, den felis memoria, a desvelá e bòrchi ku nòmber di e kancha. Señora Mauricio tambe a hiba palabra yamando presentenan bonbiní, i gradisiendo direktiva di Tirabon pa nan tremendo trabou i esfuerso pa e bunita gesto i rekonosementu. Tambe el a konta kon Arthur tabata bai tur djasabra na Washikemba pa práktika e deporte di Tiru. Señora Mauricio a elogiá tambe e forma kon tur hende ta yuda di un òf otro forma pa sigui engrandesé e deporte di Tiru na Bonaire. Na final, señora Mauricio a gradisí pa presensia di un i tur, i el a deseá partisipantenan tiradó éksito ku e kompetensia.

Direktiva di Tirabon a honrá señor Peter Silberie tambe komo persona di mas tantu aña aktivo den Tirabon. Den e kuadro aki, el a risibí un plakat di mérito for di e tesorero, señor Eric Soleana.  

Pa loke ta e kompetensia despues di e parti di desvelo di bòrchi, tabata e promé kompetensia riba nivel IPSC ku Tirabon a organisá na Bonaire. IPSC ta pará pa, “International Practical Shooting Confederation”. IPSC ta un disiplina den e deporte di tiru ku ta kresiendo mundiálmente pa e forma ku esaki ta duna oportunidat úniko pa e tiradó por move di un punta pa otro riba kancha, tirando riba diferente tipo di targets. Ku e promé stap aki ya palabrahsonan a wordu hasí kaba pa por kompetí den eksterior i tambe organisá mas kompetensia di e disiplina IPSC na Bonaire.

E kompetensia a wòrdu dirigí pa dos profeshonal for di nos hermana isla Kòrsou, señores; Ray Maharaj i tambe ku Clifton Hoyer, ku sin lugá a duda a hasi un tremendo trabou riba nivel haltu i di kalidat. Promé ku e kompetensia por a start, direktiva di Tirabon konhuntamente ku Ray i Clifton a hasi e “veiligheidsbrieding” obligatorio i a splika tur e reglanan ékstrikto di seguridat ku ta di sumo importansia rondó di e deporte di Tiru kaminda ku ta atendé ku arma. Un arma, bo ta trat’é sèmper komo se fuera ku e ta harmá. Arma no ta algu pa hasi wega kuné. Seguridat mester keda haltu den bandera tur ora i na tur momentu ora ta atendé ku arma. Esaki tabata algun di e reglanan ku a wòrdu menshoná. 

Seguidamente a pasa over pa e partisipantenan por a registrá nan mes pa nan partisipashon na e parkour, i a habri e kancha, pa despues e kompetensia start pa 13:00 or. E kaliber ku a skohe e bia aki tabata kaliber 9mm, pistol. E parkour tabata konsistí di 7 targets ku tiradónan mester a tira for di patras di un palu(dekking), tambe mester a tira for di un bentana riba “targets” pa asina purba skor mas tantu punto ku ta posibel. Na di terser lugá a sali Stephen Salas, Ethuriel Nicolaas a bai ku e premio di segundo lugá i Flavio Maestroni a sali e ganador apsoluto ku un “hit factor” di 3.443, esaki uzando e método “comstock”, kaminda ta dividí e kantidat di punto dor di e lapso di tempu ku e deportista tiradó dura pa e tira. Despues ku a saka e ganadó, tur partisipante a risibí un sertifikado di partisipashon. 

Sigur tabata un dia plasentero kaminda ku por a mira kon partisipantenan tiradó a sosialisá un ku otro, i den un ambiente ameno a interkambiá un ku otro di ideanan relashoná ku e deporte di tiru. All by all, tur presente a pasa un atardi inolvidabel na kancha Arthur Enrique Mauricio. Sin por keda afó tabata tin tambe un tremendo catering, ko’i kome i bebe liber di alkohòl naturalmente durante di e dia kompletu.

Partisipantenan tabata; Anthony Dobson, Peter Silberie, Ethuriel Nicolaas, Eric Soleana, Stephen Salas, Jadyr da Silva Piloto, Steven Senior, Quinlan de Lanoy, Sherman Blanken, Alexander Daal, Mariela Valentijn, Thuersten Winklaar, Flavio Maestroni, Jennifer Meyer, Remsley Anthony, Andrew Tweeboom, Martien van der Valk, Svenski Santaris.

Na final di e kompetensia, e vice-presidente di Tirabon, señor Peter Silberie a hiba palabra felisitando Flavio i el a gradisí tur presente pa nan aporte, dedikashon i partisipashon. Tambe el a manda palabranan di apresio i gradisimentu na nos spònsernan ku a sa di kere den Tirabon i asina hasi e kompetensia posibel; Indebon, Coral casino, Voz di Bonaire, Best brands Bonaire, Di CHIRI services (Fabi) i tambe Voyager Car Rental. 

Deel dit artikel
Rocargo
Rocargo
Rocargo
Rocargo