ORANJESTAD- E fondonan di penshun di Karibe Hulandes, ku ta traha huntu den Caribbean Pension Fund Association (CaPAs) djarason a tene nan di sinku kongreso anual na Hilton Hotel, Aruba.

Fondo di Penshun Caribisch Nederland (PCN) tambe tabata presente ku diferente empleado na e kongreso ku a dura hinter dia.

E tema di e aña aki tabata ‘Fit over the finish’, kaminda a papia entre otro kon por fasilitá ku penshonadonan yega nan edat di penshun den bon kondishon, pa asina por disfrutá di bida despues di a yega e edat di penshun. 

Manera tur aña e aña aki tabata tin vários oradó ku a tene un presentashon plenario, despues di kual a sigui interkambio den gruponan di trabou mas chikitu. 

Kontentu

Presidente di CaPAs i direktora di APFA, Sheila van Veen a bisa ku e tabata hopi kontentu ku despues di dos aña por a organisá e kongreso na un manera presensia atrobe. 

Bou di CaPAs e fondonan di penshun na anterior islanan di Antia Hulandes i Aruba ta traha huntu riba entre otro organisashon di kurso pa empleado, ehekutá estudio den e materia di penshun i tambe konsientisá hende den un sentido amplio di e importansia di un penshun adishonal banda di AOV.