Notisia

For di 1 di mart ta prohibí pa huma den Hòspital Horacio Oduber 

Potrèt - NoticiaCla

ORANJESTAD – For di 1 di mart no ta pèrmití mas pa huma den Hòspital Horacio Oduber. E medida ta un konsekuensia di e lei di tabako ku parlamento di Aruba a aseptá na luna di mei di aña pasá. Tampoko por huma den laboratorio i banko di sanger ku ta pertenesé na e hòspital.

E medida ta nifiká ku ta prohibí pa huma tantu den e edifisionan komo riba e tereno di hòspital. Esaki ta enserá e tereno di stashoná outo i e diferente poliklínikanan rondó di e hòspital.

No solamente produktonan di tabako original ta prohibí, pero tambe sigarianan eléktriko. 

E hospital a kuminsá for di luna di sèptèmber di aña pasá pa hasi diferente zona den e hòspital liber di humamentu. E zonanan temporal ta bira awor zonanan permanente. E zonanan kaminda ta tolerá humamentu ainda ta keda asina te ku 1 di mart.

Lei di tabako

E lei di tabako nobo ta prohibí personanan kaba for di mei di aña pasá pa huma den espasionan públiko, skolnan, áreanan di rekreashon i establesimentunan di kuminda. Tambe paradanan di bùs i kasinonan ta kai bou di e prohibishon. Ounke nan por ofresé un espasio será kaminda por huma.

Tambe a restringí benta di tabako. No ta pèrmití pa bende artíkulo di huma den edifisionan di gobièrnu, fasilidatnan médiko, den espasionan di arte i kultura i na komplehonan deportivo i klupnan di deporte.

Benta na personanan bou di 21 aña tambe ta prohibí. No ta pèrmití pa eksponé artíkulonan di huma visibel. No tin mag mas di bende ni sigaria ni sigá lòs, sino solamente den paki será i seyá.

E lei nobo ta parti di e plan di prevenshon nashonal pa salubridat na Aruba. Djestres porshento di e poblashon di Aruba riba 20 aña ta huma.

For di 1 di yanüari tin un fase transitorio pa duna usadónan di tabako, mundu empresarial i komunidat e chèns pa adaptá na e lei nobo.

Despues di e fase transitorio e personal ku ta enkargá ku supervishon lo garantisá e kumplimentu. Esnan ku no ta tene nan mes na e lei ta haña un but, ku por bai te 100.000 florin pa empresanan.

Deel dit artikel
Rocargo
Rocargo
Rocargo
Rocargo