Kralendijk- Djaluna anochi lat gobièrnu di Boneiru a saka un komunikado indikando ku entra djaweps 26 di ougùstùs biaheronan biahando for di Kòrsou, Aruba i St. Maarten tin ku pasa un tèst di PCR atrobe, máksimo 48 ora promé ku yega e isla.

Aruba, Kòrsou i St. Maarten for di e fecha ei ta wòrdu mirá atrobe komo pais di riesgo haltu pa Boneiru. Esaki pa motibu di e kantidat haltu di kontagio na e islanan akí. Temporalmente Boneiru ta anulá e bùbel pa biaha entre e isla i Kòrsou for di 26 di ougùstùs 2021. Ainda no ta konosí si Kòrsou ta adaptá e kondishonnan di biahe pa biaheronan for di Boneiru. Anteriormente Aruba a anulá e bùbel ku Boneiru.

Rekesito

Biaheronan ku a bakuná i biaheronan ku no a bakuná for di 12 aña for di Kòrsou, Aruba i St. Maarten ku ta biaha pa Boneiru, maksimalmente 48 ora promé ku salida mester hasi un tèst di PCR. Biaheronan ku no a bakuná for di 12 aña bai ariba mester hasi un tèst antigéniko na yegada. Si biaheronan ku no a bakuná for di Kòrsou, Aruba i St. Maarten hasi e tèst di PCR maksimalmente 24 ora promé ku salida pa Boneiru, nan no tin mester di hasi e tèst antigéniko na yegada. Biaheronan di tur edat mester yena e Deklarashon di Salú 72 – 48 ora promé ku salida pa Boneiru riba www.bonairepublichealth.com òf www.bonairecrisis.com.

Pa informashon di biahe aktual: www.bonairecrisis.com