KRALENDIJK- Djabièrnè último, fundashon FORMA a selebrá na  30 aniversario. Na e okashon di e lustro aki, diferente hende a hiba palabra. 

Diputado Nina Den Heyer a rekordá tempu ku e mes tabata traha na Forma ainda, i ku ela siña hopi den e periodo ei. “Mi ta deseá pa fundashon FORMA sigui a hopi aña mas”, asina Den Heyer a bisa.

Presidente di direktiva fundashon FORMA, Ludwig Balentien, a bisa ku pe ta un okashon spesial pa su presensia na e selebrá 30 aña fundashon FORMA. Entre otro el a elaborá riba kon a yega na e idea pa lanta fundashon FORMA. Toontje Nicolaas, tabata promé direktor. Henry Tore tabata promé presidente di direktiva i e persona ku a bin ku e idea pa kuminsá ku e fundashon. “No tabata fásil na inisio, sinembargo poulatinamente a mira e importante di fundashon FORMA su eksistensia. Hopi hende a bai lès na FORMA pa nan haña diploma. MCB a regalá fundashon FORMA, e promé kòmpiuter pa nan Registrá nan kosnan. E soño di Henry tore a haña forma. FORMA pronto ta bai haña su propio edifisio”, Balentin a bisa.

Kurashi

Nolly Oleana di parti di OSCW a bisa ku esnan ku a inisiá ku fundashon FORMA, tabatin hopi kurashi. “Ekonomia na Boneiru no tabata masha di kanta makamba e tempu aya. Mishon, Liderasko  fundashon FORMA a krea mionario. Mester atendé e asuntu di idioma pa no perhudiká nos hendenan. Na Boneiru nos ta bon den saka pia pa otro i no tin union. No laga lagadishi lastra rabu den nos desaroyo”, asina Oleana a trese dilanti.

Último persona ku a dirigí palabra tabata e direktor di fundashon FORMA, Soraida Manssché.
“Mi ta apresiá e tim di 32 persona, kende huntu nos ta kumpli ku e tareanan diario na fundashon FORMA. Nos ta trata pa esnan ku mester di un di 2 chèns den bida. Fundashon Forma a krea un base fuerte. Ta importante pa nos tin bon relashon ku nos partnernan. El a konta elaborá amplio kon for di tempu el a yega Boneiru, su meta pa atendé ku fundashon FORMA. Tur aña mas i mas hende ta inskribí na fundashon FORMA.” 

Edifisio

Un bon notisia sigur ta e echo ku según ta komprondé ku diputado Den Heyer a pèrkurá pa fondonan pa  traha edifisio nobo.